எதிர்க் குறள் : "ஒப்புரவு ஒழித்தல்" - இனியனின் கவிதை

நகைப்பார் உலகார் என அஞ்சாமல் – மனம்

நகைக்க வாழ்தல் தலை


திகைப்பார் சுற்றார் என பதுங்காமல் – ஊர்

திகைக்க புகழாள்தல் முறை


வதைப்பார் மற்றோர் என ஒழியாமல் – அறிவு

விதைத்து வளர்த்தல் கலை


பழிப்பார் உற்றம் என அடங்காமல் – தீமை

அழித்தல் தலையான மறை


அஞ்சுவார் நண்பர் என ஒதுங்காமல் – பகுத்து

அஞ்சாமல் அறிவை வரை


ஒடுக்குவார் சமூகம் என மயங்காமல் – நீதி

தடுப்போரை மறுத்து உரை


அடிப்பார் எனவொடுங்கிடாமல் - காதல் நட்பை

எடுப்பதே வாழ்வின் விலை


முடிப்பார் வாழ்வை எனத் தாழாமல் – அறிவால் (கிளர்ந்து)

வெடித்திடு உரிமைத் தடை


மிதிப்பார் என்றெண்ணி நாணாமல் – சாதி

விதிப்போரை நையப் புடை


தடுப்பார் மாற்றார் எனத் தயங்காமல் – மகிழ்வின்

மடுப்பை வாழ்வில் விதை


நொடிப்பார் எனவஞ்சாமல் போடு – பிறருரிமை

ஒடுக்காமல் உரிமை நடை